Начинот на живот, пред се, обележан со долготрајно седење и брза храна сиромашна со влакна честопати предизвикува потешкотии со варењето на храната, заради што се поголем број луѓе имаат проблеми, односно запек. Во зимските месеци кога студот ни е дополнителна причина за одложување на вежбањето, секоја помош за поттикнување на здрава и уредна столица е добредојдена. Како и кај бројни тегоби, помошта може да дојде од природата, а овој пат ви го претставуваме одличниот сојузник на цревата – псилиумот.
Лушпите псилиум во цревата се однесуваат како метла, ги чистат сите штетни материи од дебелото црево. Полисахаридните слузи со кои изобилуваат на себе ја врзуваат водата и имаат способност за зголемување на својот волумен до 15 пати. Оваа билка содржи липиди, незаситени масни киселини, влакна и многу слузи, заради што се создава ефект на „подмачкување“ на цревата.
Диеталните влакна во билката помагаат во формирање на поголем волумен и отпорни се на метаболните ензими, па така релативно лесно поминуваат низ желудникот до дебелото црево. Таму ја задржуваат водата, набабруваат и ги стимулираат цревата.
Како е најдобро да се користи псилиумот?!
Една до три лажици псилиум изматете и растопете во вода, јогурт или свежо цеден сок и консумирајте веднаш заради брзото претворање во желатинеста маса. Се препорачува да се испие дополнителна чаша вода, но и да се зголеми внесот на течности во текот на денот.
Користењето на овој природен лек нема штетно влијание врз здравјето, не ја уништува микрофлората и не го пореметува метаболизмот и работата на цревата. Може да се зема и подолго време без несакани нуспојави.
Мошне е делотворен и како помош при ублажување на хемороиди и останати проблеми врзани со метаболизмот, а помага и при регулирање на холестеролот. Се препорачува и за дијабетичарите, а повеќе студии покажале дека со внесување на по 5 г псилиум, два пати на ден, може да се потпомогне регулирањето на крвниот шеќер. Но, она што треба да се потенцира е дека – сето ова е индивидуално и потребна е консултација со лекар.
