Сега е негова сезона – искористете го максимално: Спанаќот го намалува крвниот притисок и ја враќа силата

Користа од консумација на спанаќ е повеќекратна. Добар е за здравјето, за губење на тежината, за закрепнување по болест, во бременоста, при недостаток на енергија...

Сите го паметиме Попај морнарот, преку чии цртани во детството научивме дека спанаќот експресно дава сила и прави големи мускули! Се разбира, неговиот ефект не е толку експлозивен како што укажува цртаниот филм, но дека лиснатиот зелен зеленчук е богат со витамини и минерали – е апсолутна вистина. Спанаќот треба да се јаде во текот на целата година, а особено во пролетните месеци кога организмот, по исцрпувачката зима, има недостиг на витамини и минерали. Здравите луѓе треба да го јадат редовно, но умерено.

Имено, спанаќот е познат како одличен извор на железо – една просечна порција покрива 21 процент од препорачаната дневна доза (RDA), но е уште подобар извор на витамин А (59 проценти од RDA по порција), фолна киселина (49 проценти), манган (44 проценти) и витамин Ц (34 проценти). Меѓу неговите посилни состојки се и Б – витамините, витамините Е и К, потоа магнезиум, калциум, калиум, натриум, фосфор, цинк, сулфур, јод, бакар, аминокиселината аргинин и лизин, и диететски влакна.

Лиснатиот зелен зеленчук е богат со витамини и минерали

Користа од консумацијата на спанаќ е повеќекратна. На пример, магнезиумот е потребен за функционирање на сите мускули, вклучувајќи го и срцето, калиумот ја олеснува работата на срцето и бубрезите, го поттикнува чистењето на организмот, го намалува крвниот притисок, ја стимулира работата на панкреасот и варењето на храната, Б витамините се важни во метаболизмот на јаглехидратите, ги зајакнуваат нервите и ја подобруваат активноста на мозокот и имаат корисен ефект на косата, кожата и ноктите, витаминот Ц го зајакнува имунолошкиот систем, влакната ја зголемуваат општата отпорност на организмот и ја поттикнуваат перисталтиката на цревата.

Фолната киселина е исклучително важна во изградбата на црвените крвни клетки и во бременоста, бидејќи овозможува правилен развој на фетусот.

Состојките на спанаќот, исто така, учествуваат во процесот на обновување на епидермот, го смируваат нервниот систем, дејствуваат како коагуланти, го регулираат нивото на холестерол во телото…

 Не го подгревајте спанаќот

Со цел да се зачуваат што повеќе корисни состојки и да се избегне создавање на штетни соединенија, фрлете ја водата во која сте го вареле спанаќот, бидејќи е заситена со нитрати. Секогаш треба да се подготвува непосредно пред да се консумира, бидејќи кога еднаш е термички обработен, не смее повторно да се загрева (поради создавање на нитрати, кои со дејството на бактериите во дебелото црево се претвораат во нитрозамини кои делуваат канцерогено).