Постои една работа поради која никој не е возбуден во овој период, а тоа е грипот. Иако запомнавме дека пикот на сеозната на грип обично е во декември и јануари, стручњаците велат дека пикот на оваа сезона ќе биде многу порано. Според извештаите на Центарот за контрола и превенција ан болести (ЦДЦ), овогодинешната сезона на грип би можела да биде најлоша во последните 13 години.
Експертите во САД, проценуваат дека оваа година веќе има забележано околу 880.000 случаи на грип, 7.000 хоспитализирани и 360 смртни случаи. Измината недела е забележан и првиот случај на смрт на дете поради грип. Тие сметаат дека ова е многу невообичаено, но дека веројатно е последица на уште поневообичаената пандемија поради болеста КОВИД, која во голема мера влијаеше на грипот, како и на други вирусни заболувања, објаснува епидемиологот Линет Брамер, шеф во ЦДЦ.
Иако оваа година во најголем број се појави во Централна Америка, моментално грипот е проширен низ целата земја. ЦДЦ известува дека стапката на хоспитализација е повисока отколку во истиот период во претходните сезони на грип, се до 2010 година. Всушност, хоспитализациите не биле толку високи откако се појави вирусот на свинскиот грип Х1Н1, што се случи во 2009 година.
Од оваа агенција ја потенцираат важноста на вакцинацијата против грип бидејќи тоа е најдобар начин за заштита на здравјето, а секоја година треба да се вакцинираат сите постари од 6 месеци, но истакнуваат и дека постојат антивирусни лекови со кои може да се лекува болеста.
Епидемиолозите предупредуваат дека оваа година и во Австралија сезоната на грип започнала пред вообичаениот период, а во првите месеци забележан е речиси половина од вкупниот број на случаи пријавени во текот на целата сезона 2020 година. Бројот на случаи се удвоил за две недели и достигнал речиси 90.000 пријавени случаи до почетокот на јуни (што одговара на ноември во сезоната на грип на северната хемисфера).
СОСТОЈБА ВО МАКЕДОНИЈА
Во последниот пишан извештај на страната на Институтот за јавно здравје на РСМ, во текот на 44-та недела од 2022 година (од 31.10-06.11.2022), во земјава се пријавени 14 случаи (0,76/100.000 жители) на групни пријави за заболени од грип/заболувања слични на грип, соодветно за овој период од сезоната, на исто ниво во споредба со минатата сезона и просекот.
Заболените лица се регистрирани во Тетово – 7, Дебар – 4 и Гостивар – 3. Во однос на возраста, од 15-64 години регистрирани се 10 лица, од 5-14 години – 2 и кај возрасните групи од 0-4 и над 65 години – по 1.
Кумулативно од 40-44 недела пријавени се вкупно 76 случаи (4,1/100.000 жители). Најголем број се пријавени во Тетово (36) и Гостивар (20). Во однос на возраста, најголем број е пријавен кај најголемата возрасна група од 15-64 години – 49 заболени.
Вакцинацијата против сезонски грип е најефикасна заштита од ова заболување, потенцираат од Институтот за јавно здравје и препорачуваат вакцинација на целото население, особено на лица кои припаѓаат на т.н. ризични групи (согласно препораките на СЗО):
- Постарите лица (над 65 години)
- Деца на возраст од 6-59 месеци
- Лица постари од 6 месеци со хронични болести
- Бремени жени
- Здравствени работници.
За сезоната 2022/2023, Министерството за здравство обезбеди бесплатна четиривалентна вакцина во вкупна количина од 40.000 дози, наменета за приоритетни групи население.
Дополнителни 6.000 дози комерцијални вакцини се набавени од страна на Центрите за јавно здравје, како вакцини за останатото население кое не спаѓа во горенаведените групи, истите можат да се добијат за одреден финансиски надомест и се спроведува во Центрите за јавно здравје со нивните Подрачни единици. Според податоците од Управата за електронско здравство, од почетокот на вакцинацијата, а заклучно со затворањето на овој извештај, вакцинирани се вкупно 44.793 лица од ризичните категории население со бесплатни вакцини. Во однос на комерцијалните вакцини вакцинирани се 1.921 лица. Заклучно со 44-та недела, во земјава вакцинирани се вкупно 46.714 лица со бесплатна или комерцијална вакцина.
ПОСЛЕДИЦИ ОД ГРИПОТ
Но, грипот може да има поразорен ефект отколку што мислат повеќето луѓе. Може да предизвика тешки компликации, зголемувајќи го ризикот од срцев удар, мозочен удар и пневмонија, па затоа е важно постојано да се нагласува важноста на вакцинацијата.
Повеќе за симптоми, превенцијата и компликациите што може да ги предизвика грипот може да прочитате:
