Црвената зелка е богата со витамин Ц и помага при висок крвен притисок, дигестивни проблеми, добра е за здравјето на коските и забите и е одлична превенција од рак.
Иако на нашата треза почесто се наоѓа зелената зелка, сигурни сме дека откако ќе го прочитате текстов, ќе побрзате во најблиската продавница да купите црвена зелка.
Црвената зелка има поголема хранлива вредност и задоволува 85 % од дневните потреби за витамин Ц, за разлика од зелената зелка, која задоволува 47 % од дневните потреби за овој многу важен витамин. Верувале или не, црвената зелка е побогата со витамин Ц дури и од портокалот!
Црвена зелка спаѓа меѓу алкалните намирници, кои одржуваат здрава pH вредност во телото и штитат од воспалителни процеси, рак и други сериозни заболувања.
Оваа суперздрава намирница, чија прекрасна виолетова боја укажува на изобилство од антоцијанин, содржи тиамин, фолна киселина, калциум, манган, магнезиум, железо и калиум, витамин Ц, А, Е и К, диететски влакна и витамини од Б-група.
Лековити својства на црвената зелка
-
Превенира од рак
Благодарение на изобилството на антиоксиданти и антоцијанини, црвената зелка го намалува ризикот од рак и има силни антивоспалителни својства. Антиоксидантите го неутрализираат дејството на штетните слободни радикали, кои освен што го забрзуваат стареењето го зголемуваат и ризикот од рак и срцеви заболувања. Супстанциите од зелката познати како индоли го намалуваат туморот на дојката кај жените, покажуваат истражувањата. Витаминот А, исто така, се покажа дека го намалува ризикот од рак на белите дробови.
-
Го поттикнува варењето и го намалува холестеролот
Црвената зелка е вистински чистач на цревата. Диететските влакна што ги содржи во голема мера помагаат во работата на цревата и елиминирање на отпадните материи од организмот. Оваа намирница, исто така, го намалува холестеролот и крвниот притисок, па би требало што почесто да ја консумираат сите оние кои имаат хипертензија и се изложени на ризик од запушување на крвните садови.
-
Го забавува стареењето и штити од Алцхајмерова болест
Црвената зелка се покажа како вистински сојузник на здравјето на мозокот. Нејзината консумација ќе ви помогне во функционирањето на мозокот и ќе го намали ризикот од Алцхајмерова болест. Антоцијанините од црвената зелка го намалуваат создавањето на плак во мозокот, кое е поврзано со деменција и Алцхајмерова болест.
-
Го чува здравјето на очите, коските и забите
Витаминот А со кој изобилува црвената зелка силно го штити видот и здравјето на очите, и во голема мера го намалува ризикот од макуларна дегенерација. Овој витамин, исто така, придонесува за здравјето на забите, коските и сврзното ткиво. Витаминот К од црвената зелка, исто така, придонесува и за густина на коските. Го ублажува артритисот и болките во коските и зглобовите.
Сок од црвена зелка
Потребни состојки:
- 3 сливи
- 1 помала црвена зелка
- 1 корен цвекло
- 2 стебленца целер
- 1 портокал
Подготовка: Извадете ги семките од сливите. Сите состојки измијте ги добро. Излупете го портокалот, а зелката изрендајте ја. Излупете ги и исечкајте ги цвеклото и целерот. Ставете ги сите состојки во блендер или соковник и мешајте се додека не добиете сок.
