Когнитивните проблеми кои влијаат на способноста за концентрација, заедно со заборавеноста и заморот се карактеристики на долготраен КОВИД-19 – состојби кои се јавуваат кај одредени лица по почетната зараза.
Се уште не е утврдено колку проблемите со вниманието може да бидат раширени по инфекција со коронавирусот.
Во студијата учесниците кои претходно биле позитивни на коронавирус, но не пријавиле други вообичаени симптоми на долг КОВИД-19, биле замолени да учествуваат во тестови за помнење и когнитивни способности.
Научниците откриле дека учесниците биле значајно полоши во присеќавање на личните доживувања, познати како епизодно помнење, до шест месеци по инфекцијата.
Исто така, до девет месеци по инфекцијата имале поголем пад на способноста за одржување на вниманието во споредба со незаразени поединци.
“Она што е изнендаувачки е дека, иако нашите испитаници кои прележале КОВИД-19 во периодот на тестирање немале вообичаени симптоми на таа болест, имале ослабена фокусираност и помнење“, вели д-р Сијиа Зао од Одделот за експериментална психологија на Универзитетот Оксфорд.
“Нашите наоди откриваат дека кај луѓето може со месеци да траат когнитивните последици од КОВИД-19“.
Научниците велат дека студијата открила дека епизодната меморија и способноста за концентрирање генерално се враќаат во нормала по шест, односно девет месеци.
Учесниците исто така покажале добри резултати во тестовите за други когнитивни способности, вклучително и работна меморија и планирање.
Со истражувањето биле опфатени 136 учесници.
Стивен Бурџис од Одделот за биостатистика на Универзитетот Кембриџ оценува дека, иако бројот на испитаници бил мал, “разликите меѓу групите со КОВИД и без КОВИД во однос на неколку специфични карактеристики на когнитивните способности анализирани во оваа студија се повпечатливи“.
