Ако броите калории на се што внесувате во текот на денот, тогаш ова ќе ве натера да се замислите – не се сите калории еднакви! Но ако вредноста на калориите се разликува од намирница до намирница, како тогаш да го следите внесот на калории?
Во тоа и е работата – „не треба да ги броите калориите“, вели нутриционистката доктор Либи Вивер.
Со години разни стручњаци не убедуваат дека најдобар начин да го симнеме вишокот килограми е да го следиме бројот на калории кои ги внесуваме. Поточно, дека губењето килограми е неизбежно ако трошиме повеќе калории од што внесуваме. Нутриционистката вели дека тоа баш не е точно, затоа што не се сите калории исти. За да објасни за што станува збор, како пример наведува 1000 калории внесени од засладен напиток и ист број калории внесени од брокула.
„Кога ќе испиете засладен пијалак тој шеќер брзо се апсорбира во телото и се зголемува нивото на шеќер во крвта. Тоа е прекинувач за производство на инсулин заради што глукозата најпрво се поместува до мускулите, а потоа до црниот дроб каде се складира како гликоген. Каков било остаток на гликоген се претвора во масни клетки, а тоа е причина зошто инсулинот се опишува како хормон за складирање масти“, објаснува доктор Вивер.
Сето ова доведува до други реакции во телото заради што е можно да се зголемат маркерите на воспаленија, да се зголеми нивото на триглицериди (слободни масти во крвта) да дојде до блокада на лептинот – хормон кој се поврзува со регулирање на апетитот.
Нутриционистката напоменува дека ако имате впечаток дека сте постојано гладни, можно е храната која ја консумирате и начинот на кој јадете да ги попречуваат сигналите кои ги испраќа лептинот до телото.
А сега да видиме што се случува кога ќе внесете калории од брокулата. Прво, не можете да внесете 1000 калории само од овој зеленчук затоа што за тоа количество би требало да изедете 21 чаша брокула, а лептинот би сигнализирал дека сте сити многу пред тоа. Но на страна сето ова, кога би изеле многу брокула со тоа во организмот би внесле доста важни нутритиенти, кои телото може да ги користи за разни биохемиски процеси и да ве одржи здрави, енергични и среќни. Доктор Вивер истакнува дека брокулата содржи и витамин Ц, калциум, магнезиум, сулфорафан – супстанца која му помага на телото да почне да ги елиминира карциногените супстанци од телото само десет дена откако ќе почнете секојдневно да внесувате брокула. Исто така, сулфорафанот го спречува врзувањето на естрогенот и го стимулира растот на одредени клетки во градите, одржувајќи ги здрави.
„Добрата вест е дека оваа супстанца останува во брокулата и по готвењето затоа јадете брокула“, советува нутриционистката.
Од друга страна, засладените напитоци не ви даваат ништо освен празни калории и шеќер кој го поткрева нивото на шеќер во крвта. Значи, јасно е дека не е сеедно од каде т.е. од кои намирници внесувате калории!
„Ако главно јадете природни, а не обработени намирници калориите навистина не се важни. Не само што нема да го блокираат производството на лептин кој ќе ви сигнализира кога е доста храна, туку ќе ви даде и важни нутритиенти. Затоа престанете да броите калории. Ако сакате нешто да броите, бројте ги нутритиентите кои се многу поважни за квалитетен живот“, препорачува нутриционистката, доктор Вивер.
