Поголемиот дел од луѓето главниот акцент го ставаат врз физичкото здравје, внимаваат на исхраната, одат во теретана, практикуваат јога и… подзабораваат на менталните вежби. Тренингот на мозокот, исто така, е многу важен доколку сакаме подолго да останеме витални и независни. Постојат неколку фактори кои се важни кога зборуваме за витален ум: сонот, исхраната, физичката активност, хобија кои поттикнуваат на размислување и богат друштвен живот – сето тоа се работи кои научниците ги истакнуваат како многу важни за одржување на здрав и бистар ум. Еве ги препораките:
Јадете храна за мозок
Бидејќи нашиот мозок е речиси целосно направен од масти, консумирајте храна со висок процент на здрави масти – тоа е од суштинско значење за зачувување на менталното здравје. Една студија објавена во магазинот „Aging Health“ сугерира на тоа дека правилната исхрана е многу важна за да се избегне депресија. Покрај тоа, одредена храна помага и да се подобри расположението. Зелениот зеленчук, рибата, јаткастите плодови се многу богати со Омега 3 масни киселини, кои се многу важни за менталните процеси. Од друга страна, засладените пијалаци треба да се избегнуваат, бидејќи најновите студии ги поврзуваат со намалување на мозочната маса.
Наспијте се
Добро да се наспиете е слично како да се напиете голтка од изворот на младоста, велат експертите. Научна студија објавена во магазинот „Неврон“ вели дека редовното спиење е многу важно за подобрување на помнењето и за намалување на ризикот од несоница подоцна во животот. Најдобро е да спиете меѓу седум и девет часа дневно. Спијте во затемнета просторија, а пред да легнете одбегнувајте светлечки екрани и кофеин. Од одењето во кревет направете ритуал кој ќе ви помогне полесно да потонете во сон.
Вежбајте
Физичката форма е, исто така, важна за здравјето на мозокот и е директно поврзана со способноста за учење. Една неодамнешна студија покажала дека состојбата на мозокот е директно поврзана со физичката активност. Вежбањето ја зголемува способноста на мозокот да се прилагоди на новите искуства. Активностите како што се Таи чи чуан ја зголемуваат агилноста на умот, воедно зголемувајќи ја и рамнотежата и подвижноста.
Изберете го вистинското хоби
Бидете креативни. Поминете време во квалитетни активности и пронајдете го уметникот во себе. Таквите активности докажано ја подобруваат концентрацијата. Покрај тоа, креативните хобија ја спречуваат деменцијата, вели неодамна објавена студија во магазинот „Неврологија“. Истражувањето покажало дека луѓето кои се занимавале со креативни хобија како сликање имале 73 проценти помал ризик од забавување на когнитивните функции. За одржувањето на функциите на мозокот, исто така, помага и читањето, кое обезбедува подобра концентрација.
Дружете се
Учеството во друштвени активности го зајакнува мозокот и го спречува неговото пропаѓање. Новата студија објавена во списанието „Aging & Mental Health“ покажа дека богатиот друштвен живот значително го подобрува менталното здравје. Редовното дружење со семејството и пријателите помага во одржувањето на менталната флексибилност, а интеракцијата со различни луѓе ги поттикнува мисловните процеси, проникливоста и мултитаскингот.
