Мала, но клучна студија спроведена во Велика Британија покажала дека клеточниот имунитет на пандемискиот SARS-CoV-2 вирус кај лицата кои се опоравиле од блага или асимптоматска форма на КОВИД-19, постои и шест месеци по болеста. Истражувањето е спроведено на 100 пациенти заболени од КОВИД-19, кои не биле хоспитализирани.
Научниците кои ги презентираа резултатите од истражувањето велат дека тие се смирувачки, но не значат дека луѓето, во ретки случаи, не можат повторно да се инфицираат со оваа болест.
“Иако овие резултати во нас будат внимателен оптимизам во поглед на јачината и траењето на имунитетот стекнат по инфицирање со вирусот SARS-CoV-2, тие се само еден мал дел од сложувалката. Се уште мораме многу нешта да откриеме пред до крај да сфатиме како делува имунитетот на КОВИД-19“, вели проф. Пол Мос од Универзитетот во Бирминген, еден од авторите на студијата.
Во студијата биле анализирани примероци од крв на 100 пациенти, шест месеци откако се опоравиле од блага или асимптоматска форма на болеста. Резултатите покажуваат дека нивото на антитела е намалено, но реакцијата на Т-клетките – вториот клучен дел од имуниот систем – останала силна.
Освен тоа, се покажало и дека реакцијата на Т-клетките се разликува и дека е значајно посилна кај лицата кои развиле симптоми на болеста, отколку кај оние кои немале никакви симптоми кога се заразиле.
Според истражувачите, тоа може да се толкува на два начина: можно е посилниот клеточен имунитет да нуди подобра заштита од повторна инфекција на лицата кои развиле симптоми, односно дека асимптоматските пациенти полесно се борат против вирусот и без силна имунореакција.
