Губењето на вишокот килограми најчесто е тешко и тоа добро го знаат сите оние кои ја водат оваа „битка“. Информации за разни диети и начини на исхрана, што треба, што не треба да се јаде… – од сите страни сме бомбардирани со информации, па лесно е да се изгубиме во нив.
Советот даден од експерт во својата област – злато вреди, а сепак, нутриционистите се оние кои најдобро знаат која исхрана е најдобра за човековиот организам.
Иако истите работи не функционираат подеднакво за сите, бидејќи секој организам е различен, некој има побрз, а некој побавен метаболизам, сепак, постојат некои општи правила што важат за сите.
Нутриционистите ги откриваат клучните тајни врзани за слабеењето. Еве ги нивните златни правила.
Не се фокусирајте само на јаглехидратите
Исфрлањето на јаглехидратите од исхраната може да доведе до губење на тежината, но само ако го намалите и внесот на калории. Ако ги исклучите јаглехидратите, но наместо нив во својата исхрана ги додадете јаткастите плодови, нема да изгубите од тежината. Всушност, би можеле и да додадете неколку килограми. Значи, ако сакате да изгубите тежина, обидете се да го намалите вкупниот внес на калории, советуваат нутриционистите.
Игнорирајте ја вагата
Ако сакате да го следите својот напредок во губење на тежината, наместо на вагата, фокусирајте се на панталоните кои ќе ви дадат најдобра претстава дали и колку сте ослабнале. Бројките на вагата се важни показатели за општото здравје, но исто така, се условени од различни фактори. Затоа вашата облека е многу подобар индикатор
Уживајте во храната што ја јадете
Ако не обраќате внимание на храната што ја јадете, никогаш нема да изгубите тежина, велат експертите. Со други зборови, ако за време на оброкот гледате телевизија или пишувате на мобилниот телефон, тоа може да доведе до прејадување затоа што не сте свесни за храната која ја јадете. Наместо тоа, кога јадете, немојте да правите ништо друго за да се фокусирате на секој залак што го внесувате.
Хидратацијата е многу важна
Веќе знаете многу добро дека внесот на сокови и разни други богати зашеќерени пијалаци и разни додатоци не му прават добро на вашиот организам. Но, дали знаете што да пиете наместо тоа? Вода. Како што велат нутриционистите, пиењето вода може да ви помогне да согорите до 100 екстра калории. Исто така, помага и обично црно кафе, без шеќер и млеко, се разбира. Освен што го поттикнува согорувањето на калориите, исто така, ќе ви помогне да останете фокусирани подолго на работата.
Губењето на тежина е долготраен процес
Диетите кои ветуваат брзо и драматично губење на тежината се возбудливи и атрактивни. За жал, истражувањата покажале дека по крајот на ваквата диета повторно се враќаат сите изгубени килограми. Попаметен начин? Немојте да правите ништо за губење на тежината кое не сте подготвени да го правите засекогаш. Значи, ако сакате да изгубите тежина и да останете слаби, ќе мора да се држите до одредени навики до крајот на вашиот живот.
Секогаш имајте некоја ужинка со вас
За многу луѓе е тешко да се држат до своите здрави навики за јадење кога се некаде на пат, состанок или во друштво на пријатели. Во такви ситуации лесно може да се дојде до искушение. Меѓутоа, кога станува збор за губење на тежината, доследноста е клучот. Затоа, секогаш имајте со себе нешто да грицнете, некоја здрава закуска, која ќе ви помогне да одолеете на искушението.
Немојте да правите ништо за губење на тежината кое не сте подготвени да го правите засекогаш
Јадете 3-4 оброци на ден
Поновите истражувања покажале дека стратегијата која ни советува да јадеме почесто, но помалку, е всушност, помалку ефективна. Наместо тоа, денешните нутриционисти советуваат да јадеме помал број, но похранливи оброци. Тоа ќе ни помогне да бидеме помалку опседнати со храна во текот на денот.
