Според интерен документ на американскиот Центар за контрола и превенција на болести (CDC), до кои дошле тамошните медиуми, се чини дека делта сојот предизвикува потешки форми на болеста КОВИД-19 и се шири исто како и варичелата или овчите сипаници.
Во документот, според американските медиуми, се наведува дека комплетно вакцинираните лица би можеле да ја шират делта варијантата на коронавирусот со иста брзина како и невакцинираните лица.
Центарот викендов донесе одлука за промена на насоките за комплетно вакцинираните лица во САД, кои исто така ќе треба да носат маски во затворен простор на места на кои пренесувањето на вирусот е стабилно или високо.
Според експертите од Центарот, делта сојот е исто пренослв како и овчите сипаници, при што секое заразено лице во просек инфицира осум или девет други лица. Изворниот сој беше исто така пренослив, како и обична настинка, при што секое заразено лице во просек го пренесуваше вирусот на уште две лица.
Ако вакцинираните сепак се заразат, во телото имаат иста количина вирус како и невакцинираните. Тоа значи дека веројатно ќе заразат некој друг, како и кога ќе се инфицираат невакцинирани лица.
Но, вакцинираните лица се побезбедни, укажува документот.
“Вакцините спречуваат над 90 проценти на тешки болести, но можат да бидат помалку ефикасни во спречување на инфекцијата или пренесувањето“, стои во документот.
Затоа, и покрај вакцинирањето, вирусот повеќе пробива ии се шири во заедицата.
Во документот се наведува податок дека вакцините го намалуваат ризикот од сериозни болести или смрт за 10 пати, и го намалуваат ризикот од инфекција за три пати. Презентацијата, исто така, наведува три извештаи кои укажуваат дека делта варијантата – првично позната како B.1.617.2 – може да предизвика посериозна болест.
Според податоците на Универзитетот Џон Хопкинс, САД во просек имале повеќе од 61,300 нови дневни случаи минатата недела и земјата е во четвртиот бран на пандемијата на коронавирус.
