Прекинот на дишењето (апнеа) во сон е пореметување на спиењето кое не е толку лесно да се дијагностицира. Сепак, одделни симптоми може да укажуваат на овој проблем. Најпрво тоа е исклучително гласното ’рчење кое одеднаш се запира за потоа, после прекинот, да продолжи. Токму тоа е и епизода на апнеа. Честата потреба за мокрење, исто така, може да биде симптом за апнеа во сонот, со оглед на тоа дека е утврдено дека кај пациентите со ова пореметување е зголемено излачувањето на соли и вода во текот на ноќта, што се поврзува со зголемувањето на нивото на хормонот атриопептин во крвната плазма.
Немирниот сон, ноќното потење и наглото будење се уште некои од симптомите на ова пореметување на спиењето.
Кога станува збор за дневните симптоми, главно се јавуваат замор и поспаност (уште од утрото), како и проблеми со вниманието и недостаток на концентрација. Можно е дури и личноста да заспие во ситуации како што се состаноци, предавања или возење со автомобил. Како резултат на недостаток на кислород, после ноќи со прекини во дишењето во сонот, се јавува и утринска главоболка, а раздразливоста и лошото расположение, исто така, обично го следат овој проблем.
