Без оглед дали сте во ризична група, не може да не се запрашате колкави се шансите тоа токму вам да ви се случи. Иако, струката предупредува дека се работи за многу ретки нуспојави и дека придобивките од вакцината ги надминуваат ризиците.
Но, бројни се факторите кои играат своја улога, како на пример, возраст, лекови кои пиете, бременост, па дури и висината, но ново истражување предупредува дека предвид треба да се земе и крвната група.
Имено, лицата со крвна група А имаат поголем ризик за развој на крвни згрутчувања, тврди студија спроведена на Универзитетот Лунд во Шведска, објавена во стручниот магазин Лајф. Истражувачите користеле здравствени картони од над пет милиони лица за да се пронајде потенцијалната поврзаност помеѓу крвните групи и повеќе од илјада болести.
Студијата открила дека лицата со крвна група А имаат поголем ризик од развој на тромбови, поточно белодробна емболија и венска тромбоза.
Белодробната емболија е запушување на една од белодробните артерии во белите дробови. Во повеќето случаи ја предизивикуваат крвни згрутчувања кои патуваат во белите дробови и од длабоките вени на нозете или ретко од вените во остантите делови од телото, објаснуваат од Мајо клиниката.
Претходна студија на Американското здружение за срце во 2020. Година, открила дека во споредба со лица со крвна група О, оние со крвна група А и Б имаат 51% поголем ризик за развој на длабока венска тромбоза и 47% поголем ризик за развој на белодробна емболија.
Сепак, шведската студија тврди дека лицата со крвна група А имаат поголем ризик. Но, треба да се напомене дека овие крвни згрутчувања се поинакви од оние кои се врзуваат конкретно со вакцината, а кои се однесуваат на случаи на тромбоза и тромбоцитопенија. Тоа се случува кога лицето има крвни згрутчувања (тромбоза) заедно со мал број на тромбоцити (тромбоцитопенија).
Тромбоцитите се клетки кои циркулираат во крвта и се врзуваат заедно кога ќе препознаат оштетени крвни садови, објаснува д-р Марлен Вилијамс од Медицинскиот центар Џон Хопкинс.
Иако лицата со крвна група О се помалку склони на создавање крвни згрутчувања, сепак се со поголем ризик од друг проблем со крварење. Шведската студија открила дека лицата со крвна група О почесто имаат пореметување на крварењето, поточно чир на желудникот и на дванаесетпалачното црево. Останатите пореметувања на крварењето вклучуваат хемофилија.
