Доколку страдате од дијабетес од клучно значење е да обрнете внимание на она што треба да јадете, а што треба да избегнувате.
Многу експерти за дијабетес и нутриционисти издвојуваат четири здрави хранливи материи (влакна, омега-3 масни киселини, калциум и витамин Д), кои се важни во исхраната на дијабетичарите.
Грав
Гравот е богат со влакна кои помагаат да се чувствувате сити, го стабилизираат шеќерот во крвта, па дури го намалуваат и холестеролот. Добар извор на калциум, во пола шолја бел грав ќе добиете скоро 100 мг калциум, што е околу 10 % од дневниот внес. Гравот е одличен извор на протеини. За разлика од другите протеини кои најчесто се јадат (како црвеното месо), гравот содржи малку заситени масти, кои можат да доведат до срцеви заболувања.
Млечни производи
Нема да најдете подобар извор на калциум и витамин Д од млечните производи како што се млекото, сирењето и јогуртот. Една студија покажа дека жените кои консумирале повеќе од 1 200 мг калциум и повеќе од 800 ИЕ (интернационални единици) витамин Д дневно, имале 33 % помалку шанси да развијат дијабетес отколку оние кои консумирале помалку калциум и витамин Д.
Лосос
Лососот е богат извор на омега-3 масни киселини, здрави масти кои го намалуваат ризикот од срцеви заболувања, го намалуваат обемот на половината, воспаленијата и ја подобруваат инсулинската резистенција. Лососот е, исто така, еден од најдобрите немлечни извори на витамин Д.
Темно чоколадо
Богато со антиоксиданти, може да помогне во подобрување и регулирање на холестеролот, како и намалување на крвниот притисок. Стопете го и Прелијте го врз овошјето за да добиете здрав десерт
Туна
Уште еден здрава риба богата со омега-3 масни киселини и витамин Д. Но туната може да содржи и жива, соединение што во високи дози може да предизвика невролошки проблеми. За да бидете сигурни, ограничете го внесот на туна до 350 г неделно.
Јачмен
Една од најздравите житарки, која е богата со тип на растворливи влакна (бета глукан). Истражувањата покажуваат дека бета глуканот може да го намали вкупниот и ЛДЛ холестеролот.
Овес
Како јачменот и гравот, и овесот е богат со влакна и како таков е одлична храна за дијабетичари. Истражувањата покажуваат дека овесот, исто така, може да го намали вкупниот и „лошиот“ ЛДЛ холестерол и да ја подобри инсулинската резистенција. Сите растворливи влакна кои ги содржи овесот ја забавуваат брзината со која вашето тело ги апсорбира јаглехидратите, што значи дека нивото на вашиот шеќер во крвта ќе остане стабилно.
Ореви
Само десетина ореви имаат речиси 2 г влакна, плус 2,6 г алфалиноленска киселина. Но внимателно, бидејќи содржат многу калории
Бобинки
Бобинките се природни бонбони, но за разлика од десертите тие се богати со растителни влакна и антиоксиданти наречени полифеноли. Една шолја капини содржи 7,6 г влакна, боровинките содржат 3,5 г. Антиоксидантите од боровинките се, исто така, добри за срцето.
Зелен зеленчук
Најверојатно мислите на салата, но во оваа категорија спаѓаат и репката, зелјето, како и блитвата. Сите се одличен извор на влакна. Зелениот зеленчук, исто така, е добар за вашето срце, благодарение на фолатите кои ги содржи. Овој витамин Б ги намалува нивоата на хомоцистеин, аминокиселина која во големи количини може да го зголеми ризикот од срцеви заболувања. Истражувањата покажуваат дека 400 микрограма фолна киселина дневно може да го намали хомоцистеинот за 25 %.
Леќа
Како и гравот, леќата е вистинско богатство на влакна. Една чаша варена леќа содржи неверојатни 16 г. Исто така, обезбедува близу 360 микрограми фолна киселина. Ако не сте личност за месо, леќата е добар алтернативен извор на протеини, а содржи и низа на витамини и минерали.
Лен
Ленот е најпознат како извор на влакна и алфалиноленска киселина (АЛА), која телото ја претвора во омега-3 масни киселини EPA и DHA. Во неколку студии, истражувачите ја откриле поврзаноста помеѓу зголеменото внесување на алфалиноленската киселина и намалување на шансите за заболување од срцеви болести и срцев удар. Ленот помага да се намали холестеролот и шеќерот во крвта.
Путер од кикиритки
Верувале или не, некои студии го поврзуваат путерот од кикиритки со намалување на ризикот од дијабетес. Причината можеби е во тоа што 2 лажици имаат речиси 2 г влакна. А бидејќи генерално содржи мононезаситени маснотии, се смета дека е здрав за срцето. Но, сепак, посветете внимание на количината затоа што содржи многу калории.
