Иако најзагрозени се лицата во средно доба, особено жените, метереопатијата ги погодува сите категории, од најмладите до најстарите. Дури половина од популацијата во Средна Европа е засегната од временските влијанија. Експертите предупредуваат дека чувствителноста на временските промени може да стане најчеста болест на модерното опшество.
Електромагнетните бранови кои се создаваат во атмосферата секогаш кога времето се менува влијаат на нашиот организам. Наглите промени на температурата, притисокот и влажноста на воздухот го оптоваруваат организмот. Но покрај електромагнетните бранови, климатските промени, како и неможноста човековиот организам брзо да се прилагоди на овие промени, е една од важните причини за појава на се поголем број метеоропати.
Научниците сметаат дека современото живеење, кое во најголем дел од денот се одвива во затворени простории, ја намалува способноста на организмот за природно прилагодување на различните временски услови. Доколку малку време поминуваме на отворено и во природа, нашиот организам потешко се прилагодува на промените, и ние тоа го чувствуваме.
Постојат две групи на метереопати
Во првата спаѓаат лицата кои немаат здравствени проблеми, а при промена на времето чувствуваат општа слабост и болки во одредени делови на телото.
Во втората група спаѓаат лицата кои веќе имаат хронично заболување, како висок крвен притисок, срцеви проблеми, дијабетичари, луѓе со проблеми во мускулите и во коските. Кога се менува времето тегобите кај овие лица се влошуваат.
Најчести симптоми кои ги чувствуваат метереопатите се главоболка, потиштеност и непријатна болка во коските и во зглобовите. Некои од нив според сигналите што ги добиваат од телото можат да предвидат промени на времето.
Симптоми:
Психички: замор, нагли промени на расположението, намалена концентрација, безволност, раздразливост, апатија и нарушување на сонот.
Физички: главоболка, мигрена, мачнина, вртоглавица , несвестица, ревматски болки, болки во делови на телото каде претходно имале повреда.
Влошување на срцевите тегоби: забрзана работа на срцето, чувство на срцебиење или зголемување на крвниот притисок.
