Нова студија на американските научници предвидиува дека SARS-CoV-2, вирусот што ја предизивкува КОВИД-19 со време ќе станува се помалку заразен и ќе се појавува сезонски, заедно со останатите патогени од фамилијата на коронавируси, кои предизвикуваат благи и лесни настинки.
Но, тоа ќе се случи дури кога SARS-CoV-2 ќе стане ендемски вирус, односно кога нема да предизивкува масовни зарази или тешки заболувања, велат научниците од Универзитетот Емори и Пен Стејт.
“Кога вирусот ќе доспее во таква ендемска состојба зависи од брзината на неговото ширење и од брзината на вакцинирањето. Значи, потребно е секој да се изложи на вакцина, што е можно побрзо“, вели главната авторка на студијата Џени Лавин, од Универзитетот Емори.
Нивното истражување се темели на шест човечки коронавируси, од кои четири редовно се шират меѓу луѓето и предизвикуваат благи симптоми. Останатите два, тежок акутен респираторен синдром (САРС) и блискоисточниот респираторен синдром (МЕРС) се појавија во поново време и резултираат со висока смртност, но делат слична генетика како коронавирусот кој предизвикува КОВИД-19.
Научниците се уште проучуваат колку долго траат антителата и останатите имунолошки клетки по преболување на КОВИД-19. Досегашните сознанија упатуваат на тоа дека имунитетот што ја блокира инфекцијата е релативно краток, но затоа имунитетот што ги ублажува симптомите е долготраен. Тоа значи дека лицето може неколку пати да биде заразено со коронавирус, но секој следен пат не би бил сериозен како првиот, што е слично на делувањето на организмот на обичните настинки.
Кога повеќето луѓе ќе стекнат заштита од КОВИД-19, било по природен пат преку инфекција или со вакцинација, на коронавирусот ќе бидат изложени само малите деца, а нивните заболувања се благи.
Но, без масовна вакцинација, ќе бидат потребни години и голем број починати да тоа се реализира, велат научниците.
Дури и во случај на појава на нови соеви на вирусот, како оној кој моментално се шири во Велика Британија, научниците тврдат дека имунитетот стекнат од претходните соеви е “доволно силен да спречи сериозна болест“. Токму како што е случај со четирите коронавируси, предизвикувачки на настинки кај кои имунитетот се јакне со секое ново заболување.
