Вообичаено е да дојде до пад на крвниот притисок кога ќе станеме, но ако ви се случува токм спротивното, можно е да се работи за сигнал кој открива дека е во прашање зголемен ризик од кардиоваскуларни болести, открива нова студија.
Токму овие податоци може да им помогнат на лекарите полесно да одредат какво ќе биде кардиоваскуларното здравје кај лицата подоцна во животот и како треба да се лекуваат.
Резултатите од оваа студија се објавени во списанието Хипертензија, а откриваат дека кај испитаниците на возраст помеѓу 18 и 45 години, а кои имаат хипертензија, покачувањето на крвниот притисок при станување може да значи и поголем ризик од кардиоваскуларни проблеми во иднина, а тука се вклучени срцев инфаркт, болка во градите, па дури и исхемичен удар.
“Ова истражување упатува на тоа дека промената на вредностите на крвниот притисок при станување може да биде нешто што ќе помогне при лекување на пациентите со виок крвен притисок“, вели проф. Паоло Палатини, автор на студијата од Универзитетот Падова. Во текот на истражувањето било забележано дека многумина често не се свесни дека имаат покачен крвен притисок, а друга студија тврди дека е во прашање околу 68% од луѓето.
Истражувањето објаснува дека и меѓу лицата кои знаеле дека имаат проблеми со притисокот, мал дел се грижат за контрола на таа состојба. Студијата истовремено укажува и на тоа дека контролата на состојбата е најдобриот начин за спречување на сериозни проблеми со кардиоваскуларното здравје.
Во текот на истражувањето, во кое пациентите се следеле во период од 17 години, а биле на возраст од над 18 до 44 години, се случиле 105 случаи поврзани со болести на срцето, а тоа вклучува инфаркт, градна болка поврзана со инфаркт и исхемичен удар.
Оние кои имале највисоки вредности на притисиок при станување, имале и двапати поголеми шанси дека ќе доживеат една од споменатите болести. Покачувањето на крвниот притисок при станување не е само важна промена поради која може да дојде до сериозни состојби, туку се работи за нешто што е целосно спротивно од она што треба да се случи, а тоа е да дојде до пад на вредностите на крвниот притисок.
“Кога стануваме, повеќе крв оди во нозете, а помалку во горниот дел од телото. Телото има свои механизми да се справи со тоа и крвниот притисок се враќа во нормала за неколку секунди”, вели д-р Аешита Двиведи, додавајќи дека оваа студија издвојува група на луѓе чии механизми се хиперактивни на промена на положбата на телото.
ДАЛИ ОВА ИСТРАЖУВАЊЕ ЌЕ ВНЕСЕ ПРОМЕНИ ВО ЛЕКУВАЊЕТО?
Лекарите обично не го мерат крвниот притисок кога стоиме, вели проф. Палатини, но студијата заклучува дека можеби токму тоа треба да се прави.
“Исправниот пристап би бил да се измери крвниот притисок на пациентот и кога стои и кога седи. Доколку има голема разлика, треба да се започне со терапија“, додава тој. Тој исто така наведува дека промени во мерењето на притисокот веројатно нема да се случат бидејќи оваа студија бара понатамошни истражувања.
Во меѓувреме, важно е да се оди на редовни контроли, а тоа се годишни систематски прегледи кои вклучуваат и мерење на крвниот притисок. И младите и повозрасните треба да се фокусираат на промена на животниот стил и да вложуваат во превенција.
КОИ СЕ ОПТИМАЛНИ ВРЕДНОСТИ НА КРВНИОТ ПРИТИСОК?
- Состојбата на притисок е оптимална ако систолниот притисок е помал од 120, а дијастолниот е помал од 80 mmHg.
- Состојбата на притисок е нормална ако систолниот притисок е понизок од 130, а дијастолниот е помал од 85 mmHg.
- Состојбата на притисок е гранична ако систолниот притисок е помеѓу 130 и 139 mmHg и дијастолниот притисок е помеѓу 85 и 89 mmHg. Во тој случај контролирајте го повторно за една година.
